A cidade será o escenario das derradeiras xornadas da temporada tras o éxito da edición do pasado ano
O Campionato de España de Tríatlon por Clubs e Remudistas Mixtos e de Talentos celebrará as súas últimas xornadas na Coruña os días 18 e 19 de xuño. A Federación Española de Tríatlon volveu a elixir a cidade como sede das decisivas últimas xornadas da Liga Nacional de Clubs. Ademais, a Mariña volverá a acoller a Copa do Mundo de Paratríatlon.
A concelleira de Deportes, Mónica Martínez, celebrou a volta desta competición á Coruña tras o éxito acadado o pasado año. “O goberno municipal de Inés Rey aposta pola celebración de grandes eventos deportivos e a cidade converteuse nunha das sedes favoritas para o tríatlon”, apuntou.
A celebración na Coruña das derradeiras xornadas da Liga Nacional garante carreiras con grande emoción. Ademais, a Copa do Mundo de Paratríatlon achegará á cidade a deportistas nacionais e internacionais. A aposta do Concello da Coruña polo deporte adaptado é firme. “Cremos que o deporte é a mellor ferramenta para promover a inclusión, a vida independente e a igualdade entre todas as persoas, e en especial, entre as que teñen algún tipo de discapacidade”, apunta Mónica Martínez.
O pasado 2021 celebráronse tamén na cidade estas probas de gran relevancia nacional e internacional. A Federación Española de Tríatlon volve este 2022 a confiar na cidade ante a grande organización da pasada edición, que estaba aínda marcada pola pandemia.
